ദക്ഷിണാഫ്രിക്കൻ പരമ്പരയും ഇംഗ്ലണ്ട് പര്യടനവും അടുടുത്തായി വരുന്നതിനാൽ, രണ്ട് സീരീസുകൾക്കും രണ്ട് പ്രത്യേക ടീമുകളെ ഇന്ത്യൻ ടീം സെലക്ടർമാർ പ്രഖ്യാപിക്കുമെന്നാണ് റിപ്പോർട്ട്. ഇംഗ്ലണ്ട് പര്യടനത്തിന് മുന്നോടിയായി സീനിയർ കളിക്കാരെ ഫ്രഷ് ആയി നിലനിർത്താൻ അവർക്ക് വിശ്രമം നൽകാനുള്ള ആശയമാണ് ഇതിന് കാരണം. ഇതോടെ യുവതാരങ്ങൾക്ക് അന്താരാഷ്ട്ര ക്രിക്കറ്റിൽ തങ്ങളുടെ കഴിവ് പ്രകടിപ്പിക്കാനുള്ള അവസരമാണ് വന്നെത്തിയിരിക്കുന്നത്.
സൂര്യകുമാർ യാദവ്, ദീപക് ചാഹർ തുടങ്ങിയ താരങ്ങൾ പരിക്കിൽ നിന്ന് പൂർണ്ണ മുക്തരല്ലാത്തതിനാൽ, ദക്ഷിണാഫ്രിക്കക്കെതിരായ ടി20 പരമ്പരയിൽ ചില പുതുമുഖങ്ങൾ കാണപ്പെടുമെന്ന് പ്രതീക്ഷിക്കുന്നു. ഇന്ത്യൻ പ്രീമിയർ ലീഗിന്റെ നിലവിലെ സീസണിൽ, പ്രതിസന്ധി ഘട്ടങ്ങളിൽ പോലും മികച്ച പ്രകടനം നടത്താനുള്ള കഴിവ് പ്രകടിപ്പിച്ച നിരവധി യുവതാരങ്ങൾ ഉണ്ടായിട്ടുണ്ട്. ഏതാനും ദിവസങ്ങൾക്കുള്ളിൽ സെലക്ടർമാരുടെ പ്രഖ്യാപനം പ്രതീക്ഷിക്കുന്ന സാഹചര്യത്തിൽ, മുൻ ഇന്ത്യൻ ക്രിക്കറ്റ് താരം വസീം ജാഫർ ദക്ഷിണാഫ്രിക്കൻ പരമ്പരയ്ക്ക് സാധ്യതയുള്ള ഇന്ത്യൻ ടീമിനെ തിരഞ്ഞെടുത്തു.
ശിഖർ ധവാൻ, ഋതുരാജ് ഗെയ്‌ക്‌വാദ്, പൃഥ്വി ഷാ എന്നിവരെ ഓപ്പണർമാരുടെ റോളിലേക്ക് വസീം ജാഫർ തിരഞ്ഞെടുത്തു, കൂടാതെ ഐപിഎല്ലിന്റെ നിലവിലെ സീസണിലെ അവരുടെ പ്രകടനങ്ങളെ അദ്ദേഹം പ്രശംസിച്ചു. ഓൾറൗണ്ടർ ഹാർദിക് പാണ്ഡ്യയെ ടീമിന്റെ ക്യാപ്റ്റനായി തിരഞ്ഞെടുത്തപ്പോൾ, രാഹുൽ ത്രിപാഠിക്കും ഹർഷൽ പട്ടേലിനും അവസരം ലഭിക്കുമെന്നും മുൻ ഇന്ത്യൻ ബാറ്റർ കണക്കുകൂട്ടി. എന്നാൽ, പേസ് സെൻസേഷൻ ഉംറാൻ മാലിക്കിന് വസീം ജാഫറുടെ ടീമിൽ ഇടം നേടാനായില്ല, ഉംറാൻ മാലിക്ക് മതിയായ ഫസ്റ്റ് ക്ലാസ് മത്സരങ്ങൾ കളിക്കുകയും ഇന്ത്യ എയ്ക്ക് വേണ്ടി കളിക്കുകയും ചെയ്തുകൊണ്ട് അദ്ദേഹത്തിന്റെ കളിയിൽ കൂടുതൽ വ്യതിയാനങ്ങൾ കൊണ്ടുവരേണ്ടതുണ്ട് എന്ന് വസീം ജാഫർ അഭിപ്രായപ്പെട്ടു.
ദക്ഷിണാഫ്രിക്കൻ പരമ്പരയ്ക്കുള്ള വസീം ജാഫറിന്റെ സാധ്യത ടീം: ശിഖർ ധവാൻ, ഋതുരാജ് ഗെയ്‌ക്‌വാദ്, പൃഥ്വി ഷാ, രാഹുൽ ത്രിപാഠി, ഹാർദിക് പാണ്ഡ്യ, സഞ്ജു സാംസൺ (WK), തിലക് വർമ്മ, ദിനേശ് കാർത്തിക് (wk), യുസ്വേന്ദ്ര ചാഹൽ, അക്സർ പട്ടേൽ, ഹർഷൽ പട്ടേൽ, ഭുവനേശ്വർ കുമാർ, അവേഷ് ഖാൻ, കുൽദീപ് യാദവ്, മൊഹ്‌സിൻ ഖാൻ/ ടി നടരാജൻ.
