ഒന്നും അവസാനിക്കുന്നില്ല ഞങ്ങൾ പോരാടും :മുന്നറിയിപ്പ് നൽകി ക്യാപ്റ്റൻ രോഹിത് ശർമ്മ

ഇന്ത്യൻ പ്രീമിയർ ലീഗ് 2022-ലെ ആറ് മത്സരങ്ങൾ തുടർച്ചയായി തോറ്റതിന് ശേഷവും, മുംബൈ ഇന്ത്യൻസ് ക്യാപ്റ്റൻ രോഹിത് ശർമ്മയ്ക്ക് തന്റെ ടീമിന് ‘എന്താണ് സംഭവിക്കുന്നതെന്ന്’ മനസ്സിലാകുന്നില്ല. ഇതോടൊപ്പം ഈ സീസണിൽ 6 മത്സരങ്ങൾ കളിച്ചിട്ടും, മുംബൈയുടെ ഏറ്റവും മികച്ച പ്ലെയിംഗ് ഇലവൻ കോമ്പിനേഷൻ ഇതുവരെ കണ്ടെത്തിയിട്ടില്ലെന്ന് രോഹിത് കരുതുന്നു.

6 മത്സരങ്ങളിൽ നിന്ന് 114 റൺസ് നേടിയ രോഹിത് തന്നെ തന്റെ ഫോം കണ്ടെത്താൻ പാടുപെടുകയാണ് എന്നതും ഒരു വസ്തുതയാണ്.എൽഎസ്ജിക്കെതിരെ 18 റൺസിന് പരാജയപ്പെട്ടതിന് പിന്നാലെ, മുംബൈ ഇന്ത്യൻസിന്റെ തുടർ തോൽവികൾക്ക് പിന്നിലെ യഥാർത്ഥ കാരണം തനിക്ക് ഇതുവരെ കണ്ടെത്താനായില്ല എന്ന് എംഐ ക്യാപ്റ്റൻ രോഹിത് ശർമ്മ പറഞ്ഞു. “എന്താണ് തെറ്റായി സംഭവിക്കുന്നതെന്ന് എനിക്കറിയാമെങ്കിൽ, ഞാൻ അത് തിരുത്തുമായിരുന്നു, പക്ഷെ അത് എന്താണെന്ന് എനിക്ക് മനസ്സിലാകുന്നില്ല. എല്ലാ ഗെയിമുകൾക്കും ഞാൻ നല്ല രീതിയിൽ തയ്യാറെടുക്കുന്നു, എന്നാൽ ജയം കണ്ടെത്താനാവുന്നില്ല,” രോഹിത് പറഞ്ഞു.

“ടീമിനെ എന്നിൽ നിന്ന് ആരാധകരും മാനേജ്മെന്റും പ്രതീക്ഷിക്കുന്ന അവസ്ഥയിലേക്ക് എത്തിക്കാതിരിക്കുന്നതിന്റെ പൂർണ്ണ ഉത്തരവാദിത്തം ഞാൻ ഏറ്റെടുക്കുന്നു. എന്നാൽ, മുന്നോട്ട് നോക്കുക എന്നത് പ്രധാനമാണ്. ഇത് ലോകാവസാനമല്ല, ഞങ്ങൾ മുമ്പ് തിരിച്ചെത്തിയിട്ടുണ്ട്, ഞങ്ങൾ വീണ്ടും ശ്രമിക്കും, ഞങ്ങൾ വീണ്ടും വീണ്ടും ശ്രമിക്കും,” നായകൻ തന്റെ ധീരമായ മുഖം ഉയർത്താൻ ശ്രമിച്ചെങ്കിലും അദ്ദേഹത്തിന്റെ മുഖത്ത് നിരാശ പ്രകടമായിരുന്നു.

ആറ് മത്സരങ്ങൾ കളിച്ചിട്ടും, ഇതുവരെ മുംബൈ ഇന്ത്യൻസിന്റെ മികച്ച പ്ലെയിങ് ഇലവൻ കണ്ടെത്താനായിട്ടില്ല എന്നും ക്യാപ്റ്റൻ പറഞ്ഞു. “ഞങ്ങൾ കളിക്കുന്ന ഓരോ കളിയും ഓരോ അവസരമാണ്, പ്രത്യേക സാഹചര്യങ്ങൾക്കും പ്രത്യേക ടീമിനും ഏറ്റവും അനുയോജ്യമായ ഞങ്ങളുടെ ഏറ്റവും മികച്ച പ്ലേയിംഗ് ഇലവൻ ഏതെന്ന് ഞങ്ങൾ ചിന്തിക്കുകയും കണ്ടെത്താൻ ശ്രമിക്കുകയും ചെയ്യുന്നു. ഞങ്ങൾ ഇപ്പോൾ ആറ് മത്സരങ്ങൾ തോറ്റു, ഞങ്ങളുടെ ശരിയായ കോമ്പിനേഷൻ എന്താണെന്ന് മനസിലാക്കാൻ ഞങ്ങൾ ഇപ്പോഴും ശ്രമിക്കുന്നു, പക്ഷേ ഇതെല്ലാം ഞങ്ങൾ കളിക്കുന്ന എതിരാളികളെ ആശ്രയിച്ചിരിക്കുന്നു,” രോഹിത് പറഞ്ഞു.